duniya phulon ki shaidai kanTon ko apnae kaun

duniyā phūloñ kī shaidā.ī kāñToñ ko apnā.e kaun

achchhe vaqt ke sāthī sab haiñ dukh meñ haath baTā.e kaun

asr-e-nau kā shā.ir apnī zaat ke ḳhol meñ hai mahbūs

fikr-o-fan ke phuul khilā kar shahr-e-ġhazal mahkā.e kaun

lafzoñ ko talvār banā kar khel rahe haiñ farzāne

kyā hogā anjām-e-ma.ānī samjhe aur samjhā.e kaun

saaqī ke har izn-o-ishāra par bhī maiñ pyāsā hī rahā

yaaro mujh ko sharm ye aa.ī tanhā jaam uThā.e kaun

un par kaise uñglī uThe un par kaise tohmat aa.e

vo to faqīh-e-shahr haiñ yaaro un kā jurm batā.e kaun

tum ne diye jalā.e ham ne apnā ḳhuun jalāyā hai

kal tārīḳh likhegī us ko aaj ye baat baḌhā.e kaun

ham sab mujrim ham sab munsif kaun dhare kis par ilzām

talḳh bahut hai jām-e-sadāqat is ko haath lagā.e kaun

har mīnā-bāzār se 'mehdī' aañkh bachā kar guzrā huuñ

peT ke rog se fursat kab hai dil kā rog lagā.e kaun

duniya phulon ki shaidai kanTon ko apnae kaun

achchhe waqt ke sathi sab hain dukh mein hath baTae kaun

asr-e-nau ka shair apni zat ke KHol mein hai mahbus

fikr-o-fan ke phul khila kar shahr-e-ghazal mahkae kaun

lafzon ko talwar bana kar khel rahe hain farzane

kya hoga anjam-e-maani samjhe aur samjhae kaun

saqi ke har izn-o-ishaara par bhi main pyasa hi raha

yaro mujh ko sharm ye aai tanha jam uThae kaun

un par kaise ungli uThe un par kaise tohmat aae

wo to faqih-e-shahr hain yaro un ka jurm batae kaun

tum ne diye jalae hum ne apna KHun jalaya hai

kal tariKH likhegi us ko aaj ye baat baDhae kaun

hum sab mujrim hum sab munsif kaun dhare kis par ilzam

talKH bahut hai jam-e-sadaqat is ko hath lagae kaun

har mina-bazar se 'mehdi' aankh bacha kar guzra hun

peT ke rog se fursat kab hai dil ka rog lagae kaun