duniya se alag humne maiKHane ka dar dekha

duniyā se alag ham ne maiḳhāne kā dar dekhā

maiḳhāne kā dar dekhā allāh kā ghar dekhā

goshe se nasheman ke aahoñ kā asar dekhā

sayyād kā ghar jalte be-barq-o-sharar dekhā

donoñ ke maze luuTe donoñ kā asar dekhā

allāh kā ghar dekhā maiḳhāne kā dar dekhā

yuuñ hashr meñ saireñ kiiñ firdaus-o-jahannam kī

kuchh der udhar dekhā kuchh der udhar dekhā

ai shaiḳh vo ka.aba ho yā ho dar-e-mai-ḳhāna

tū ne mujhe jab dekhā sajde hī meñ sar dekhā

naala hameñ karnā thā dam ishq kā bharnā thā

sau rañg se marnā thā har rañg se mar dekhā

jab mauj ubhartī hai kahtī hai vo shoḳhī se

baazū meñ bat-e-mai ke surḳhāb kā par dekhā

Tāñke diye jaate haiñ kyuuñ lab siye jaate haiñ

hañsne kā mazā tū ne ai zaḳhm-e-jigar dekhā

nisbat nahīñ mujh ko kuchh bekas ke bujhe dil se

bujhte hue tujh ko bhī aa.e sham-e-sahar dekhā

sahme hue baiThe haiñ kho.e hue baiThe haiñ

jis raat ke armāñ the us raat ko Dar dekhā

phal phuul nahīñ laate ye bāġh-e-mohabbat meñ

har naḳhl-e-tamannā ko be-barg-o-samar dekhā

ka.abe meñ nazar aa.e jo sub.h azaañ dete

maiḳhāne meñ rātoñ ko un kā bhī guzar dekhā

kuchh kaam nahīñ mai se go ishq hai us shai se

maiñ riñd 'riyāz' aise dāman bhī na tar dekhā

duniya se alag hum ne maiKHane ka dar dekha

maiKHane ka dar dekha allah ka ghar dekha

goshe se nasheman ke aahon ka asar dekha

sayyaad ka ghar jalte be-barq-o-sharar dekha

donon ke maze luTe donon ka asar dekha

allah ka ghar dekha maiKHane ka dar dekha

yun hashr mein sairen kin firdaus-o-jahannam ki

kuchh der udhar dekha kuchh der udhar dekha

ai shaiKH wo kaba ho ya ho dar-e-mai-KHana

tu ne mujhe jab dekha sajde hi mein sar dekha

nala hamein karna tha dam ishq ka bharna tha

sau rang se marna tha har rang se mar dekha

jab mauj ubharti hai kahti hai wo shoKHi se

bazu mein bat-e-mai ke surKHab ka par dekha

Tanke diye jate hain kyun lab siye jate hain

hansne ka maza tu ne ai zaKHm-e-jigar dekha

nisbat nahin mujh ko kuchh bekas ke bujhe dil se

bujhte hue tujh ko bhi aae sham-e-sahar dekha

sahme hue baiThe hain khoe hue baiThe hain

jis raat ke arman the us raat ko Dar dekha

phal phul nahin late ye bagh-e-mohabbat mein

har naKHl-e-tamanna ko be-barg-o-samar dekha

kabe mein nazar aae jo subh azan dete

maiKHane mein raaton ko un ka bhi guzar dekha

kuchh kaam nahin mai se go ishq hai us shai se

main rind 'riyaz' aise daman bhi na tar dekha