duniya se dagh-e-zulf-e-siyah-fam le gaya

duniyā se dāġh-e-zulf-e-siyah-fām le gayā

maiñ gor meñ charāġh-e-sar-e-shām le gayā

kī tark maiñ ne shaiḳh o barahman kī pairvī

dair-o-haram meñ mujh ko tirā naam le gayā

dozaḳh meñ jal gayā kabhī jannat meñ ḳhush rahā

mar kar bhī saath gardish-e-ayyām le gayā

maiñ justujū-e-kufr meñ pahuñchā ḳhudā ke paas

ka.aba tak in butoñ kā mujhe naam le gayā

pahnā kafan to kūcha-e-qātil meñ paa.ī raah

ka.aba meñ mujh ko jāma-e-ehrām le gayā

nafrat huī do-rañgī-e-lail-o-nahār se

maiñ sub.h o shaam us ko lab-e-bām le gayā

kuchh lutf ishq kā na milā jīte-jī 'munīr'

nāhaq kā rañj muft kā ilzām le gayā

duniya se dagh-e-zulf-e-siyah-fam le gaya

main gor mein charagh-e-sar-e-sham le gaya

ki tark main ne shaiKH o barahman ki pairwi

dair-o-haram mein mujh ko tera nam le gaya

dozaKH mein jal gaya kabhi jannat mein KHush raha

mar kar bhi sath gardish-e-ayyam le gaya

main justuju-e-kufr mein pahuncha KHuda ke pas

kaba tak in buton ka mujhe nam le gaya

pahna kafan to kucha-e-qatil mein pai rah

kaba mein mujh ko jama-e-ehram le gaya

nafrat hui do-rangi-e-lail-o-nahaar se

main subh o sham us ko lab-e-baam le gaya

kuchh lutf ishq ka na mila jite-ji 'munir'

nahaq ka ranj muft ka ilzam le gaya