دنیا سے تعلق تو نبھانا ہی پڑے گا

دنیا سے تعلق تو نبھانا ہی پڑے گا

ہم کیا ہیں زمانے کو بتانا ہی پڑے گا

یہ لوگ سمجھتے ہیں کہاں رمز و کنایہ

اسلوب نیا کوئی بنانا ہی پڑے گا

کچھ دیر مری آنکھ میں تو جاگ رہا ہے

کچھ دیر ستاروں کو جگانا ہی پڑے گا

پھینکا تھا جسے ہم نے کبھی کھوٹا سمجھ کر

لگتا ہے وہ سکہ بھی چلانا ہی پڑے گا

معلوم تو ہو کون ہے اب میرا وفادار

اک رات چراغوں کو بجھانا ہی پڑے گا

جس آنکھ میں ہر وقت چمکتے ہیں ستارے

اس آنکھ سے اک خواب چرانا ہی پڑے گا