duniya to de rahi thi tan-asaniyan bahut

duniyā to de rahī thī tan-āsāniyāñ bahut

ham kyā kareñ ki ham meñ thiiñ ḳhuddāriyāñ bahut

hogā maze meñ chāhe kahīñ bhī tū jā base

ai yaar tujh ko aatī haiñ makkāriyāñ bahut

surḳhī lagā ke tum ko nahīñ aanā chāhiye

ghar jā ke mujh ko hotī haiñ dushvāriyāñ bahut

rīsh-e-darāz gosha-nashīñ aur siyah libās

furqat meñ lāzmī haiñ ye ġham-ḳhvāriyāñ bahut

dhokā daġhā fareb mohabbat vafā ḳhulūs

dilkash haiñ dostoñ kī adākāriyāñ bahut

maulā karegā ḳhair ye Dholak ye qumqume

haiñ is galī meñ kis liye tayyāriyāñ bahut

chhoḌo bhī yaar aaj mohabbat kā ġham nahīñ

duniyā meñ aur bhī haiñ pareshāniyāñ bahut

maiñ ne 'razā' baḌoñ ko sunā.ī thī aarzū

hotī haiñ is ḳhatā pe pashemāniyāñ bahut

duniya to de rahi thi tan-asaniyan bahut

hum kya karen ki hum mein thin KHuddariyan bahut

hoga maze mein chahe kahin bhi tu ja base

ai yar tujh ko aati hain makkariyan bahut

surKHi laga ke tum ko nahin aana chahiye

ghar ja ke mujh ko hoti hain dushwariyan bahut

rish-e-daraaz gosha-nashin aur siyah libas

furqat mein lazmi hain ye gham-KHwariyan bahut

dhoka dagha fareb mohabbat wafa KHulus

dilkash hain doston ki adakariyan bahut

maula karega KHair ye Dholak ye qumqume

hain is gali mein kis liye tayyariyan bahut

chhoDo bhi yar aaj mohabbat ka gham nahin

duniya mein aur bhi hain pareshaniyan bahut

main ne 'raza' baDon ko sunai thi aarzu

hoti hain is KHata pe pashemaniyan bahut