duniya walon ne chahat ka mujhko sila anmol diya

duniyā vāloñ ne chāhat kā mujh ko sila anmol diyā

pairoñ meñ zanjīreñ Dālīñ hāthoñ meñ kashkol diyā

itnā gahrā rañg kahāñ thā raat ke maile āñchal kā

ye kis ne ro ro ke gagan meñ apnā kājal ghol diyā

ye kyā kam hai us ne baḳhshā ek mahaktā dard mujhe

vo bhī haiñ jin ko rañgoñ kā ik chamkīlā ḳhol diyā

mujh sā be-māya apnoñ kī aur to ḳhātir kyā kartā

jab bhī sitam kā paikāñ aayā maiñ ne siina khol diyā

biite lamhe dhyān meñ aa kar mujh se savālī hote haiñ

tū ne kis banjar miTTī meñ man kā amrit Dol diyā

ashkoñ kī ujlī kaliyāñ hoñ yā sapnoñ ke kundan phuul

ulfat kī mīzān meñ maiñ ne jo thā sab kuchh tol diyā

duniya walon ne chahat ka mujh ko sila anmol diya

pairon mein zanjiren Dalin hathon mein kashkol diya

itna gahra rang kahan tha raat ke maile aanchal ka

ye kis ne ro ro ke gagan mein apna kajal ghol diya

ye kya kam hai us ne baKHsha ek mahakta dard mujhe

wo bhi hain jin ko rangon ka ek chamkila KHol diya

mujh sa be-maya apnon ki aur to KHatir kya karta

jab bhi sitam ka paikan aaya main ne sina khol diya

bite lamhe dhyan mein aa kar mujh se sawali hote hain

tu ne kis banjar miTTi mein man ka amrit Dol diya

ashkon ki ujli kaliyan hon ya sapnon ke kundan phul

ulfat ki mizan mein main ne jo tha sab kuchh tol diya