duniya wahi hai aur wahi saman-e-zindagi

duniyā vahī hai aur vahī sāmān-e-zindagī

lekin badalte rahte haiñ unvān-e-zindagī

kyā kaam kar rahā hai ye mehmān-e-zindagī

bhartā hai kyuuñ gunāh se dāmān-zindagī

vahshat-nasīb hai sar-o-sāmān-zindagī

ulfat meñ taar taar hai dāmān-zindagī

hai dekhne kī chiiz bhī kuchh dekhtā hai kyā

sair-e-jahāñ hai ḳhvāb-e-pareshān-e-zindagī

kaafī hai apne vāste ārā.ish-e-vajūd

ārā.ishoñ se paak hai dāmān-zindagī

maujoñ se kheltā huā bāhar nikal na jā

āḳhir ye kis liye ġham-e-tūfān-e-zindagī

ik din hayāt-o-maut kī is khīñch-tān meñ

hāthoñ se chhūT jā.egā dāmān-e-zindagī

marnā hī jab jahāñ meñ hai jiine kā mā-hasal

nāhaq uThā.eñ kis liye ehsān-e-zindagī

samjhe hue the ham jise aish-o-tarab kā ghar

zindān-e-ġham banā hai vo aivān-e-zindagī

piirī chalegī kyā mirī piirī ke daur meñ

aa.e kahāñ se pahlī sī ab shān-e-zindagī

hai fasl-e-gul kā zor bahāroñ pe hai shabāb

kyā pur-fazā hai aaj gulistān-e-zindagī

kis se vafā kī dahr meñ 'ḳhushtar' umiid hai

ahd-e-vafā se duur hai paimān-e-zindagī

duniya wahi hai aur wahi saman-e-zindagi

lekin badalte rahte hain unwan-e-zindagi

kya kaam kar raha hai ye mehman-e-zindagi

bharta hai kyun gunah se daman-zindagi

wahshat-nasib hai sar-o-saman-zindagi

ulfat mein tar tar hai daman-zindagi

hai dekhne ki chiz bhi kuchh dekhta hai kya

sair-e-jahan hai KHwab-e-pareshan-e-zindagi

kafi hai apne waste aaraish-e-wajud

aaraishon se pak hai daman-zindagi

maujon se khelta hua bahar nikal na ja

aaKHir ye kis liye gham-e-tufan-e-zindagi

ek din hayat-o-maut ki is khinch-tan mein

hathon se chhuT jaega daman-e-zindagi

marna hi jab jahan mein hai jine ka ma-hasal

nahaq uThaen kis liye ehsan-e-zindagi

samjhe hue the hum jise aish-o-tarab ka ghar

zindan-e-gham bana hai wo aiwan-e-zindagi

piri chalegi kya meri piri ke daur mein

aae kahan se pahli si ab shan-e-zindagi

hai fasl-e-gul ka zor bahaaron pe hai shabab

kya pur-faza hai aaj gulistan-e-zindagi

kis se wafa ki dahr mein 'KHushtar' umid hai

ahd-e-wafa se dur hai paiman-e-zindagi