durun-e-chashm har ek KHwab mar raha hai bas

durūn-e-chashm har ik ḳhvāb mar rahā hai bas

hamāre paas yahī āj-kal bachā hai bas

tirī talab thī zamāna tujhe zamāna milā

mirī talab thī ḳhudā so mirā ḳhudā hai bas

udaas hai na kisī se huā hai jhagḌā koī

baḌe dinoñ se yūñhī dil dukhā huā hai bas

jahāñ pe chāho mire haath ko jhaTak denā

mujhe pata hai ta.alluq ye aam sā hai bas

khaḌī huī huuñ kināre chanāb ke sar-e-shām

bhañvar bhañvar mirī āñkhoñ meñ ghūmtā hai bas

kiyā jo ġhaur to har-samt nāchtī thī aag

mujhe lagā thā mirā ghar hī jal rahā hai bas

hamāre paas nahīñ 'sa.adiya' koī rastā

hamāre paas yahī ek rāstā hai bas

durun-e-chashm har ek KHwab mar raha hai bas

hamare pas yahi aaj-kal bacha hai bas

teri talab thi zamana tujhe zamana mila

meri talab thi KHuda so mera KHuda hai bas

udas hai na kisi se hua hai jhagDa koi

baDe dinon se yunhi dil dukha hua hai bas

jahan pe chaho mere hath ko jhaTak dena

mujhe pata hai talluq ye aam sa hai bas

khaDi hui hun kinare chanab ke sar-e-sham

bhanwar bhanwar meri aankhon mein ghumta hai bas

kiya jo ghaur to har-samt nachti thi aag

mujhe laga tha mera ghar hi jal raha hai bas

hamare pas nahin 'sadiya' koi rasta

hamare pas yahi ek rasta hai bas