dushman hi jaanti thi meri zindagi mujhe

dushman hī jāntī thī mirī zindagī mujhe

dhokā qadam qadam pe jo detī ga.ī mujhe

ai chashm-e-fitna-sāz kahāñ le ga.ī mujhe

ab naam dhar rahe haiñ jahāñ meñ sabhī mujhe

zauq-e-nazar ne diid kī mohlat na dī mujhe

jalvoñ kī tere varna kamī kuchh na thī mujhe

maiñ to tumhārī yaad meñ mar jā.ūñ yā jiyūñ

tum ko qasam hai yaad na karnā kabhī mujhe

andāz dilbarī ke agar husn ko mile

husn-āshnā nigāh-e-mohabbat milī mujhe

allah re mere ashk-e-nadāmat kī bekasī

vaj.h-e-nuzūl rahmat-e-haq ban ga.ī mujhe

‘zāhir’ milā hai tuur kā surma avaam ko

ḳhāk-e-dar-e-habīb mayassar huī mujhe

dushman hi jaanti thi meri zindagi mujhe

dhoka qadam qadam pe jo deti gai mujhe

ai chashm-e-fitna-saz kahan le gai mujhe

ab nam dhar rahe hain jahan mein sabhi mujhe

zauq-e-nazar ne did ki mohlat na di mujhe

jalwon ki tere warna kami kuchh na thi mujhe

main to tumhaari yaad mein mar jaun ya jiyun

tum ko qasam hai yaad na karna kabhi mujhe

andaz dilbari ke agar husn ko mile

husn-ashna nigah-e-mohabbat mili mujhe

allah re mere ashk-e-nadamat ki bekasi

wajh-e-nuzul rahmat-e-haq ban gai mujhe

‘zahir’ mila hai tur ka surma awam ko

KHak-e-dar-e-habib mayassar hui mujhe