dushman ke ghar rahe na hamare yahan rahe

dushman ke ghar rahe na hamāre yahāñ rahe

āḳhir phir itnī raat ga.e tak kahāñ rahe

do din bhī jab chaman meñ na ham shādmāñ rahe

phir ham ko kyā bahār rahe yā ḳhizāñ rahe

saaqī nahīñ to darham-o-barham hai anjuman

shīsha kahāñ rahegā surāhī kahāñ rahe

kyā jāneñ aap dil kī lagī ko ḳhatā mu'āf

ye aag vo nahīñ ki lage to dhuāñ rahe

mahfil udaas sāġhar-o-mīnā udaas hai

mai-kash hai dam-ba-ḳhud ki rahe tū kahāñ rahe

hangām-e-naz’ aa.e ho taskīn ke liye

ab dil ke zaḳhm qābil-e-marham kahāñ rahe

taakā kiye raqīb ke dar ko hazār baar

kyā kyā shab-e-firāq meñ ham bad-gumāñ rahe

kahne meñ dil ke aa ke kahīñ ke nahīñ rahe

rusvā-e-ḳhalq ho ke rahe ham jahāñ rahe

kaise bhulā.eñ bhūlne vaale tirā ḳhayāl

har dam jo dam ke saath rahā hai jahāñ rahe

apne parā.e kar to ga.e haiñ supurd-e-ḳhāk

ab musht-e-ḳhāk uḌ ke na jaane kahāñ rahe

'bismil' jo dekh legā zamāna kahegā kuchh

har dam jo yūñhī aañkh se aañsū ravāñ rahe

dushman ke ghar rahe na hamare yahan rahe

aaKHir phir itni raat gae tak kahan rahe

do din bhi jab chaman mein na hum shadman rahe

phir hum ko kya bahaar rahe ya KHizan rahe

saqi nahin to darham-o-barham hai anjuman

shisha kahan rahega surahi kahan rahe

kya jaanen aap dil ki lagi ko KHata mu'af

ye aag wo nahin ki lage to dhuan rahe

mahfil udas saghar-o-mina udas hai

mai-kash hai dam-ba-KHud ki rahe tu kahan rahe

hangam-e-naz’ aae ho taskin ke liye

ab dil ke zaKHm qabil-e-marham kahan rahe

taka kiye raqib ke dar ko hazar bar

kya kya shab-e-firaq mein hum bad-guman rahe

kahne mein dil ke aa ke kahin ke nahin rahe

ruswa-e-KHalq ho ke rahe hum jahan rahe

kaise bhulaen bhulne wale tera KHayal

har dam jo dam ke sath raha hai jahan rahe

apne parae kar to gae hain supurd-e-KHak

ab musht-e-KHak uD ke na jaane kahan rahe

'bismil' jo dekh lega zamana kahega kuchh

har dam jo yunhi aankh se aansu rawan rahe