دشمن کی طرف جانے کیوں اس بار کھڑی ہے

دشمن کی طرف جانے کیوں اس بار کھڑی ہے

دنیا جو ہمیشہ سے مرے ساتھ رہی ہے

ممکن ہے کہ اس بار تجھے اپنا بنا لوں

حالانکہ محبت تو کئی بار ہوئی ہے

میں جا بھی نہیں سکتا تجھے چھوڑ کے لیکن

اک بات مگر دل پہ مرے خوب لگی ہے

چپ چاپ کھڑا اس کو فقط دیکھ رہا ہوں

دیوار پہ بچپن کی جو تصویر ٹنگی ہے

کچھ بول مری جان کہ دل کو ہو تسلی

کیا غم ہے تجھے کس لیے چپ چاپ کھڑی ہے

قدموں کے نشاں جب سے ترے اس میں پڑے ہیں

تب جا کے مرے شہر میں برسات ہوئی ہے

اک تیری محبت کی نشانی کے علاوہ

کمرے میں پڑی اب کے ہر اک چیز نئی ہے