dushmanon se rah KHafa ek had talak

dushmanoñ se rah ḳhafā ik had talak

dostoñ se bhī nibhā ik had talak

ham-nivāla ham-piyāla koī ho

raaz us ko bhī batā ik had talak

jaan de kar vāste māñ-bāp ke

qarz hotā hai adā ik had talak

dūriyāñ maanā bahut achchhī nahīñ

qurbateñ phir bhī baḌhā ik had talak

haq meñ hai bīmār ke lāzim duā

kaam aatī hai davā ik had talak

jis ko tū samjhe huā hai rāz-dār

raaz us ko bhī batā ik had talak

ham vafādāroñ kī ḳhātir ai sanam

chāhiye tum ko jafā ik had talak

kaun 'sāhil' jaan paayā us kā raaz

tum ko bhī bas hai patā ik had talak

dushmanon se rah KHafa ek had talak

doston se bhi nibha ek had talak

ham-niwala ham-piyala koi ho

raaz us ko bhi bata ek had talak

jaan de kar waste man-bap ke

qarz hota hai ada ek had talak

duriyan mana bahut achchhi nahin

qurbaten phir bhi baDha ek had talak

haq mein hai bimar ke lazim dua

kaam aati hai dawa ek had talak

jis ko tu samjhe hua hai raaz-dar

raaz us ko bhi bata ek had talak

hum wafadaron ki KHatir ai sanam

chahiye tum ko jafa ek had talak

kaun 'sahil' jaan paya us ka raaz

tum ko bhi bas hai pata ek had talak