dushwar hai ab rasta aasan se aage

dushvār hai ab rāstā āsān se aage

rakh umar-e-kuhan pichhlā qadam dhyān se aage

aTkā huā sūraj hai isī ek sabaq par

baḌhtā nahīñ din raat kī gardān se aage

qismat kī ḳharābī hai ki jaatā huuñ ġhalat samt

paḌtā hai bayābān bayābān se aage

pahuñchā to nahīñ maiñ dar-e-vaslat pe magar haañ

suntā huuñ kahīñ hai shab-e-hijrān se aage

na taḳht na ābād koī shahr sabā kā

ik girya hai dīvār-e-sulaimān se aage

ḳhamyāza hai is ādat-e-isrāf kā aur bas

jo be-sar-o-sāmānī hai sāmān se aage

kal shor bapā dil meñ thā pahchān kī ḳhātir

ab sakta hai āzār kā pahchān se aage

niklī na kisī ek kī ta.abīr muāfiq

sau ḳhvāb the har ḳhvāb-e-pareshān se aage

dushwar hai ab rasta aasan se aage

rakh umar-e-kuhan pichhla qadam dhyan se aage

aTka hua suraj hai isi ek sabaq par

baDhta nahin din raat ki gardan se aage

qismat ki KHarabi hai ki jata hun ghalat samt

paDta hai bayaban bayaban se aage

pahuncha to nahin main dar-e-waslat pe magar han

sunta hun kahin hai shab-e-hijran se aage

na taKHt na aabaad koi shahr saba ka

ek girya hai diwar-e-sulaiman se aage

KHamyaza hai is aadat-e-israf ka aur bas

jo be-sar-o-samani hai saman se aage

kal shor bapa dil mein tha pahchan ki KHatir

ab sakta hai aazar ka pahchan se aage

nikli na kisi ek ki tabir muafiq

sau KHwab the har KHwab-e-pareshan se aage