Dub jaenge sitare aur bikhar jaegi raat

Duub jā.eñge sitāre aur bikhar jā.egī raat

dekhtī rah jā.eñgī āñkheñ guzar jā.egī raat

raat kā pahlā pahr hai ahl-e-dil ḳhāmosh haiñ

sub.h tak rotī huī āñkhoñ se bhar jā.egī raat

aarzū kī be-hisī kā gar yahī aalam rahā

be-talab aa.egā din aur be-ḳhabar jā.egī raat

raushnī kaisī agar aalam añdherā ho gayā

dil meñ bas jā.egī āñkhoñ meñ utar jā.egī raat

koī aahaT bhī na sun pā.egā ḳhvābīda chaman

ḳhushk pattoñ par dabe paañv guzar jā.egī raat

dil meñ rah jā.eñge tanhā.ī ke qadmoñ ke nishāñ

apne pīchhe kitnī yādeñ chhoḌ kar jā.egī raat

shaam hī se so ga.e haiñ log āñkheñ muuñd kar

kis kā darvāza khulegā kis ke ghar jā.egī raat

der tak 'shahzād' āñkhoñ meñ phiregī chāñdnī

kaT to jā.egī magar kyā kuchh na kar jā.egī raat

Dub jaenge sitare aur bikhar jaegi raat

dekhti rah jaengi aankhen guzar jaegi raat

raat ka pahla pahr hai ahl-e-dil KHamosh hain

subh tak roti hui aankhon se bhar jaegi raat

aarzu ki be-hisi ka gar yahi aalam raha

be-talab aaega din aur be-KHabar jaegi raat

raushni kaisi agar aalam andhera ho gaya

dil mein bas jaegi aankhon mein utar jaegi raat

koi aahaT bhi na sun paega KHwabida chaman

KHushk patton par dabe panw guzar jaegi raat

dil mein rah jaenge tanhai ke qadmon ke nishan

apne pichhe kitni yaaden chhoD kar jaegi raat

sham hi se so gae hain log aankhen mund kar

kis ka darwaza khulega kis ke ghar jaegi raat

der tak 'shahzad' aankhon mein phiregi chandni

kaT to jaegi magar kya kuchh na kar jaegi raat