Dub jaane ke siwa ishq mein chaara hi nahin

Duub jaane ke sivā ishq meñ chārā hī nahīñ

is samundar kā kisī samt kinārā hī nahīñ

talḳhī-e-zaḳhm-e-jigar jis ko gavārā hī nahīñ

us ko nāvak nigah-e-nāz ne maarā hī nahīñ

sunte aate haiñ ki ik roz qayāmat hogī

aap ne zulf-e-pareshāñ ko sañvārā hī nahīñ

parda-e-dil se sadā yaar kī aa hī jaatī

ham tazabzub meñ rahe us ko pukārā hī nahīñ

baaz ham aise tasavvur se ki ab tak jis ne

ek naqsha bhī tirā Thiik utārā hī nahīñ

phir shikāyat hai mire dil ke taḌapne kī abas

taak kar tiir koī aap ne maarā hī nahīñ

kyā hai dariyā-e-mohabbat ke udhar kyā ma.alūm

terī talvār ne us ghaaT utārā hī nahīñ

un kī mahfil kī ajab baat hai kyā arz kareñ

tazkira sab kā hai ik zikr hamārā hī nahīñ

mil ga.ī us kī nazar merī nazar se āḳhir

ab to denā hī paḌā dil koī chārā hī nahīñ

aur bhī dīda-e-dil rakhte haiñ pur-ḳhūñ ham se

kuchh tire hijr meñ ye rañg hamārā hī nahīñ

pārsā.ī meñ hai fard us kī hayā ai 'betāb'

shauq-ālūd nazar us ko gavārā hī nahīñ

Dub jaane ke siwa ishq mein chaara hi nahin

is samundar ka kisi samt kinara hi nahin

talKHi-e-zaKHm-e-jigar jis ko gawara hi nahin

us ko nawak nigah-e-naz ne mara hi nahin

sunte aate hain ki ek roz qayamat hogi

aap ne zulf-e-pareshan ko sanwara hi nahin

parda-e-dil se sada yar ki aa hi jati

hum tazabzub mein rahe us ko pukara hi nahin

baz hum aise tasawwur se ki ab tak jis ne

ek naqsha bhi tera Thik utara hi nahin

phir shikayat hai mere dil ke taDapne ki abas

tak kar tir koi aap ne mara hi nahin

kya hai dariya-e-mohabbat ke udhar kya malum

teri talwar ne us ghaT utara hi nahin

un ki mahfil ki ajab baat hai kya arz karen

tazkira sab ka hai ek zikr hamara hi nahin

mil gai us ki nazar meri nazar se aaKHir

ab to dena hi paDa dil koi chaara hi nahin

aur bhi dida-e-dil rakhte hain pur-KHun hum se

kuchh tere hijr mein ye rang hamara hi nahin

parsai mein hai fard us ki haya ai 'betab'

shauq-alud nazar us ko gawara hi nahin