Dub ke dekh liya dard ki gahrai mein

Duub ke dekh liyā dard kī gahrā.ī meñ

aaj kī raat guzar jā.egī tanhā.ī meñ

sham-e-dil laayā huuñ ye soch ke mahfil meñ tirī

ho kamī kuchh na tirī anjuman-ārā.ī meñ

be-sabab hogā mire saath meñ rusvā vo bhī

naam us kā bhī hai shāmil merī rusvā.ī meñ

ba.ad muddat ke use dekhā to ehsās huā

har dabī choT ubhar aatī hai purvā.ī meñ

yuuñ to har ek adā hai tirī zālim lekin

hai qayāmat hī qayāmat tirī añgḌā.ī meñ

chāk-dāmāñ kī numā.ish meñ ye ġham haiñ mujh ko

vo bhī maujūd thā us vaqt-e-tamāshā.ī meñ

kah do mutrib se 'nazar' sāz-e-mohabbat na bajā

us kī pāzeb kī jhankār hai shahnā.ī meñ

Dub ke dekh liya dard ki gahrai mein

aaj ki raat guzar jaegi tanhai mein

sham-e-dil laya hun ye soch ke mahfil mein teri

ho kami kuchh na teri anjuman-arai mein

be-sabab hoga mere sath mein ruswa wo bhi

nam us ka bhi hai shamil meri ruswai mein

baad muddat ke use dekha to ehsas hua

har dabi choT ubhar aati hai purwai mein

yun to har ek ada hai teri zalim lekin

hai qayamat hi qayamat teri angDai mein

chaak-daman ki numaish mein ye gham hain mujh ko

wo bhi maujud tha us waqt-e-tamashai mein

kah do mutrib se 'nazar' saz-e-mohabbat na baja

us ki pazeb ki jhankar hai shahnai mein