Dubne wale ko tinke ka sahaara hai bahut

Dūbne vaale ko tinke kā sahārā hai bahut

raat tārīk sahī ek sitārā hai bahut

dard uThtā hai jigar meñ kisī tūfāñ kī tarah

tab tirī yādoñ ke dāman kā kināra hai bahut

zulm jis ne kiye vo shaḳhs banā hai munsif

zulm par zulm ne mazlūm ko maarā hai bahut

raah dushvār hai pag pag pe haiñ kāñTe lekin

rāh-rau ke liye manzil kā ishāra hai bahut

us ko paane kī tamannā hī rahī jīvan bhar

duur se ham ne masarrat ko nihārā hai bahut

fāsle baḌhte ga.e umr bhī Dhaltī hī ga.ī

vasl kā ḳhvāb liye vaqt guzārā hai bahut

hoñT ḳhāmosh the ik aah bhī ham bhar na sake

bārhā dil ne magar tum ko pukārā hai bahut

jhūTī tārīf se lagtā hai bahut Dar 'monā'

mīThī bātoñ ne hī shīshe meñ utārā hai bahut

Dubne wale ko tinke ka sahaara hai bahut

raat tarik sahi ek sitara hai bahut

dard uThta hai jigar mein kisi tufan ki tarah

tab teri yaadon ke daman ka kinara hai bahut

zulm jis ne kiye wo shaKHs bana hai munsif

zulm par zulm ne mazlum ko mara hai bahut

rah dushwar hai pag pag pe hain kanTe lekin

rah-rau ke liye manzil ka ishaara hai bahut

us ko pane ki tamanna hi rahi jiwan bhar

dur se hum ne masarrat ko nihaara hai bahut

fasle baDhte gae umr bhi Dhalti hi gai

wasl ka KHwab liye waqt guzara hai bahut

honT KHamosh the ek aah bhi hum bhar na sake

barha dil ne magar tum ko pukara hai bahut

jhuTi tarif se lagta hai bahut Dar 'mona'

miThi baaton ne hi shishe mein utara hai bahut