Dubta dard ka suraj tere izhaar mein tha

Dūbtā dard kā sūraj tire iz.hār meñ thā

DhūñDne vaalā tujhe zaat ke ambār meñ thā

aaj tanhā huuñ maiñ iḳhlās ke us jañgal meñ

aise aahū kī tarah ho ki kabhī Daar meñ thā

tesha-e-yād meñ ab khod rahā huuñ us ko

jo kabhī dafan mire zehn kī dīvār meñ thā

dopahar umr kī saa.e meñ mirī jis ke Dhalī

vo ghanā peḌ bhī is shahr ke ashjār meñ thā

yuuñ to sab log the is shor sharābe meñ magan

koī apnā na magar is bhare bāzār meñ thā

aaj tum sāhab-e-izzat ho to inkār nahīñ

naam merā bhī kabhī surḳhi-e-aḳhbār meñ thā

sochtā huuñ to laraz uThtā hai ehsās-e-anā

dā.era ban ke bhī maiñ vaqt kī purkār meñ thā

Dubta dard ka suraj tere izhaar mein tha

DhunDne wala tujhe zat ke ambar mein tha

aaj tanha hun main iKHlas ke us jangal mein

aise aahu ki tarah ho ki kabhi Dar mein tha

tesha-e-yaad mein ab khod raha hun us ko

jo kabhi dafan mere zehn ki diwar mein tha

dopahar umr ki sae mein meri jis ke Dhali

wo ghana peD bhi is shahr ke ashjar mein tha

yun to sab log the is shor sharabe mein magan

koi apna na magar is bhare bazar mein tha

aaj tum sahab-e-izzat ho to inkar nahin

nam mera bhi kabhi surKHi-e-aKHbar mein tha

sochta hun to laraz uThta hai ehsas-e-ana

daera ban ke bhi main waqt ki purkar mein tha