Dubti nabz chalti hawa dekhna

Dūbtī nabz chaltī havā dekhnā

mausam-e-hijr meñ aur kyā dekhnā

rut badalte hue vaqt lagtā nahīñ

ghar se niklo to pahle fazā dekhnā

zindagī ik safar hai musalsal safar

TūTnā hai kahāñ silsila dekhnā

chhīn legī matā.a-e-ġham-e-ishq bhī

ek din mujh se merī anā dekhnā

mashġhala ban gayā zindagī kā mirī

ek hī shaḳhs kā rāsta dekhnā

ḳhvāb taskīn bhī hai aziyyat bhī hai

ḳhvāb ke baa'd tā۔bīr kyā dekhnā

ab kisī kī bhī pahchān mushkil nahīñ

aa gayā hai mujhe aa.ina dekhnā

sochnā shahr meñ amn kā raaj hai

jab bhī 'aḳhtar' koī dar khulā dekhnā

Dubti nabz chalti hawa dekhna

mausam-e-hijr mein aur kya dekhna

rut badalte hue waqt lagta nahin

ghar se niklo to pahle faza dekhna

zindagi ek safar hai musalsal safar

TuTna hai kahan silsila dekhna

chhin legi mataa-e-gham-e-ishq bhi

ek din mujh se meri ana dekhna

mashghala ban gaya zindagi ka meri

ek hi shaKHs ka rasta dekhna

KHwab taskin bhi hai aziyyat bhi hai

KHwab ke ba'd ta۔bir kya dekhna

ab kisi ki bhi pahchan mushkil nahin

aa gaya hai mujhe aaina dekhna

sochna shahr mein amn ka raj hai

jab bhi 'aKHtar' koi dar khula dekhna