dud-e-atish ki tarah yan se na Tal jaunga

dūd-e-ātish kī tarah yaañ se na Tal jā.ūñgā

sham.a-sāñ mahfil-e-jānāñ hī meñ jal jā.ūñgā

duur se bhī use dekhūñ to ye chitvan meñ kahe

aa ke diide abhī talvoñ tale mal jā.ūñgā

dil-e-muztar ye kahe hai vahīñ le chal varna

toḌ chhātī ke kivāḌoñ ko nikal jā.ūñgā

maiñ huuñ ḳhurshīd-e-sar-e-koh yaqīñ hai ki vo maah

aa.egā baam pe tab jab ki maiñ Dhal jā.ūñgā

aaj bhī koī na le jā.egā vaañ mujh ko to bas

kal nahīñ hai mujhe maiñ jī hī se kal jā.ūñgā

vaañ se uThtā huuñ to kahtā hai ye pā-e-raftār

jab zamīñ par tū rakhegā maiñ phisal jā.ūñgā

ba-ḳhudā husn-e-butāñ kā yahī sab se hai kalām

vo chhalāvā huuñ ki tum sab ko maiñ chhal jā.ūñgā

aa ke barsoñ meñ vo mujh paas ye shab kahne lage

yaañ Thaharne meñ bahut se haiñ ḳhalal jā.ūñgā

teġha qātil kā kahe hai ki duvālī bandū

muuTh kī tarah se tum sab pe maiñ chal jā.ūñgā

go mizāj is kā ye badlā ki kahe hai mujhe yuuñ

dekho tum aa.e to maiñ ghar se nikal jā.ūñgā

par rahā jā.egā kab hai mirī hālat taġh.īr

yuuñ na jā.ūñgā to maiñ bhes badal jā.ūñgā

'jur.at' ash.ār-e-junūñ-ḳhez kah ab aur ki maiñ

le ke ye turbat-e-saudā pe ġhazal jā.ūñgā

dud-e-atish ki tarah yan se na Tal jaunga

shama-san mahfil-e-jaanan hi mein jal jaunga

dur se bhi use dekhun to ye chitwan mein kahe

aa ke dide abhi talwon tale mal jaunga

dil-e-muztar ye kahe hai wahin le chal warna

toD chhati ke kiwaDon ko nikal jaunga

main hun KHurshid-e-sar-e-koh yaqin hai ki wo mah

aaega baam pe tab jab ki main Dhal jaunga

aaj bhi koi na le jaega wan mujh ko to bas

kal nahin hai mujhe main ji hi se kal jaunga

wan se uThta hun to kahta hai ye pa-e-raftar

jab zamin par tu rakhega main phisal jaunga

ba-KHuda husn-e-butan ka yahi sab se hai kalam

wo chhalawa hun ki tum sab ko main chhal jaunga

aa ke barson mein wo mujh pas ye shab kahne lage

yan Thaharne mein bahut se hain KHalal jaunga

tegha qatil ka kahe hai ki duwali bandu

muTh ki tarah se tum sab pe main chal jaunga

go mizaj is ka ye badla ki kahe hai mujhe yun

dekho tum aae to main ghar se nikal jaunga

par raha jaega kab hai meri haalat taghir

yun na jaunga to main bhes badal jaunga

'jurat' ashaar-e-junun-KHez kah ab aur ki main

le ke ye turbat-e-sauda pe ghazal jaunga