dur faza mein ek parinda khoya hua uDanon mein

duur fazā meñ ek parinda khoyā huā uḌānoñ meñ

us ko kyā mālūm zamīñ par chaḌhe haiñ tiir kamānoñ meñ

phuul toḌ ke log le ga.e ūñche baḌe makānoñ meñ

ab ham kāñTe sajā ke rakkheñ miTTī ke gul-dānoñ meñ

be-dar-o-bām Thikānā jis meñ dhuul dhuup sannāTā ġham

vahī hai mujh vahshī ke ghar meñ jo kuchh hai vīrānoñ meñ

aap ke qadmoñ kī aahaT se shāyad ḳhvāb se jaag uThe

soī huī vīrān udāsī kamroñ meñ dālānoñ meñ

rañj o alam tanhā.ī ke sāthī guzar basar ko kaafī haiñ

ḳhushī to shāmil ho jaatī hai aa.e ga.e mehmānoñ meñ

armāñ saje saje palkoñ par taar taar thī apnī jeb

apne liye to zaḳhm-e-dil the bāzār aur dukānoñ meñ

vaqt ne kaisā ruup diyā jo log nahīñ pahchān sake

kaash ki ḳhud ko dekh bhī sakte jag ke ā.īna-ḳhānoñ meñ

zikr-e-'shams' udaas karegā chhoḌo aur koī baat karo

aise shaḳhs kī kyuuñ tum gintī ginte ho insānoñ meñ

dur faza mein ek parinda khoya hua uDanon mein

us ko kya malum zamin par chaDhe hain tir kamanon mein

phul toD ke log le gae unche baDe makanon mein

ab hum kanTe saja ke rakkhen miTTi ke gul-danon mein

be-dar-o-baam Thikana jis mein dhul dhup sannaTa gham

wahi hai mujh wahshi ke ghar mein jo kuchh hai viranon mein

aap ke qadmon ki aahaT se shayad KHwab se jag uThe

soi hui viran udasi kamron mein dalanon mein

ranj o alam tanhai ke sathi guzar basar ko kafi hain

KHushi to shamil ho jati hai aae gae mehmanon mein

arman saje saje palkon par tar tar thi apni jeb

apne liye to zaKHm-e-dil the bazar aur dukanon mein

waqt ne kaisa rup diya jo log nahin pahchan sake

kash ki KHud ko dekh bhi sakte jag ke aaina-KHanon mein

zikr-e-'shams' udas karega chhoDo aur koi baat karo

aise shaKHs ki kyun tum ginti ginte ho insanon mein