dur ghar se kahin is tarh bhi jaya jae

duur ghar se kahīñ is tarh bhī jaayā jaa.e

der tak dhuup kī bārish meñ nahāyā jaa.e

apnī yādoñ ko mire paas koī chhoḌ gayā

ġham judā hone kā kis tarh bhulāyā jaa.e

sab parā.e hue hone se parāyā us ke

sochtā huuñ kise ab apnā banāyā jaa.e

dil dukhāne se kisī kā unheñ miltī hai ḳhushī

baat aisī hai to phir mujh ko rulāyā jaa.e

hone vaalī hai charāġhoñ kī hukūmat qaa.em

rāt-bhar ke liye sūraj ko chhupāyā jaa.e

ḳhāmushī dekh ke phailī huī ābādī meñ

ye parindoñ ne kahā shor machāyā jaa.e

mil ke jiine ke liye log hue haiñ yakjā

ziist kā bojh hai tanhā na uThāyā jaa.e

dur ghar se kahin is tarh bhi jaya jae

der tak dhup ki barish mein nahaya jae

apni yaadon ko mere pas koi chhoD gaya

gham juda hone ka kis tarh bhulaya jae

sab parae hue hone se paraya us ke

sochta hun kise ab apna banaya jae

dil dukhane se kisi ka unhen milti hai KHushi

baat aisi hai to phir mujh ko rulaya jae

hone wali hai charaghon ki hukumat qaem

raat-bhar ke liye suraj ko chhupaya jae

KHamushi dekh ke phaili hui aabaadi mein

ye parindon ne kaha shor machaya jae

mil ke jine ke liye log hue hain yakja

zist ka bojh hai tanha na uThaya jae