dur jo bah raha tha dariya sa

duur jo bah rahā thā dariyā sā

paas aa kar lagā vo sahrā sā

hausle kī hai baat āñdhī meñ

jal rahā hai charāġh nanhā sā

us kī ta.abīr talḳh hai kitnī

ḳhvāb dekhā jo ham ne mīThā sā

ajnabiyyat kī dhund se niklūñ

koī aa.e nazar jo apnā sā

thā chamaknā magar mirī qismat

gir gayā TuuT kar sitāra sā

jal rahe haiñ charāġh yādoñ ke

ye jo kamre meñ hai ujālā sā

tum ki Thahre hue kināre se

maiñ ki bahtā huā huuñ dariyā sā

phuul sā lag rahā thā jo kal tak

chubh rahā hai vo aaj kāñTā sā

muskurāte haiñ zaḳhm-e-dil 'ash.har'

hai nazar meñ koī masīhā sā

dur jo bah raha tha dariya sa

pas aa kar laga wo sahra sa

hausle ki hai baat aandhi mein

jal raha hai charagh nanha sa

us ki tabir talKH hai kitni

KHwab dekha jo hum ne miTha sa

ajnabiyyat ki dhund se niklun

koi aae nazar jo apna sa

tha chamakna magar meri qismat

gir gaya TuT kar sitara sa

jal rahe hain charagh yaadon ke

ye jo kamre mein hai ujala sa

tum ki Thahre hue kinare se

main ki bahta hua hun dariya sa

phul sa lag raha tha jo kal tak

chubh raha hai wo aaj kanTa sa

muskuraate hain zaKHm-e-dil 'ashhar'

hai nazar mein koi masiha sa