دور نکلا ہے افق پر کہیں تارہ کوئی

دور نکلا ہے افق پر کہیں تارہ کوئی

یاد آتا ہے مجھے جان سے پیارا کوئی

عشق ناکام کا الزام نصیبوں پہ گیا

اسی نسبت سے کوئی جیتا نہ ہارا کوئی

تم جسے چاہو اسے چاہے زمانہ سارا

اس سے بڑھ کر نہیں ہوتا ہے خسارہ کوئی

شہر کا شہر تعاقب میں نکل آیا ہے

میں نے بستی پہ کیا تھا جو اشارہ کوئی

تم نہ سمجھو گے کبھی تاج کا مٹی ہونا

تم نے دیکھا ہی نہیں وقت کا مارا کوئی

رہ گزر نام کی تیری تھی سو تنہا کاٹی

ہم نے آواز لگائی نہ پکارا کوئی