dur nikla hai ufuq par kahin tara koi

duur niklā hai ufuq par kahīñ taara koī

yaad aatā hai mujhe jaan se pyārā koī

ishq-e-nākām kā ilzām nasīboñ pe gayā

isī nisbat se koī jiitā na haarā koī

tum jise chāho use chāhe zamāna saarā

is se baḌh kar nahīñ hotā hai ḳhasāra koī

shahr kā shahr ta'āqub meñ nikal aayā hai

maiñ ne bastī pe kiyā thā jo ishāra koī

tum na samjhoge kabhī taaj kā miTTī honā

tum ne dekhā hī nahīñ vaqt kā maarā koī

rahguzar naam kī terī thī so tanhā kaaTī

ham ne āvāz lagā.ī na pukārā koī

dur nikla hai ufuq par kahin tara koi

yaad aata hai mujhe jaan se pyara koi

ishq-e-nakaam ka ilzam nasibon pe gaya

isi nisbat se koi jita na haara koi

tum jise chaho use chahe zamana sara

is se baDh kar nahin hota hai KHasara koi

shahr ka shahr ta'aqub mein nikal aaya hai

main ne basti pe kiya tha jo ishaara koi

tum na samjhoge kabhi taj ka miTTi hona

tum ne dekha hi nahin waqt ka mara koi

rahguzar nam ki teri thi so tanha kaTi

hum ne aawaz lagai na pukara koi