دور رہ کر قرین جیسی ہے

دور رہ کر قرین جیسی ہے

بے یقینی یقین جیسی ہے

میرا کوئی مکاں نہیں لیکن

میری حالت مکین جیسی ہے

نقل ہوتی ہے اصل کا حصہ

بہتری بہترین جیسی ہے

ہجر سے وصل کی محبت بھی

سانپ اور آستین جیسی ہے

یہ کڑھائی ہے اس کے ہاتھ کی اور

دیکھنے میں مشین جیسی ہے

جس جگہ چاہیں آپ رک جائیں

دل کی وسعت زمین جیسی ہے

فرق ظاہر ہو کس طرح ان کا

ہر امانت امین جیسی ہے

آسماں سے پرے بھی دیکھو گے

آنکھ گر دوربین جیسی ہے

اس کا اتنا ہی احترام کرو

عارفی عارفین جیسی ہے