dur rah kar watan ki faza se jab bhi ahbab ki yaad aai

duur rah kar vatan kī fazā se jab bhī ahbāb kī yaad aa.ī

hijr meñ rah gayā dil taḌap kar aañkh fart-e-alam se bhar aa.ī

gulshan-e-hasrat-o-ārzū kī jab kalī koī khulne pe aa.ī

bād-e-sarsar ne maare tamāñche is ḳhatā par ki kyuuñ muskurā.ī

ahl-e-zar se ye uns-o-mohabbat be-zaroñ se ye andāz-e-nafrat

khul gayā aap kā zohd-o-taqvā dekh lī aap kī pārsā.ī

vo tasanno.a hai aḳhlāq kyā hai vo numā.ish hai iḳhlās kab hai

vo mohabbat nahīñ hai riyā hai ho na jab tak diloñ meñ safā.ī

un kā anjām hai sar-bulandī jin ke dil meñ nahīñ ḳhud-pasandī

jin ko mahbūb hai ḳhāksārī un ko aatī nahīñ ḳhud-satā.ī

dil hai insān kā ābgīna is ke jalvoñ kā hai ye ḳhazīna

baiThne deñ na gard-e-kudūrat ābgīne kī rakkhe safā.ī

roz-e-mahshar kī vo jāñ-gudāzī had na hogī sarāsīmgī kī

kaam aa.egī us din yaqīnan āsiyoñ ke liye mustafā.ī

terī rahmat kā dil ko yaqīñ hai is meñ mujh ko koī shak nahīñ hai

hogī maqbūl ik roz yārab tere dar kī mirī jubba-sā.ī

daur-daura hai kizb-o-riyā kā hai diloñ se ḳhulūs aaj anqā

dekhiye ab kahāñ jā rahī hai apne markaz se haT kar ḳhudā.ī

kyā ab insāniyat mar chukī hai bad-zanī dil meñ ghar kar chukī hai

kuchh samajh meñ nahīñ aa rahā hai kyuuñ hai bad-ḳhvāh bhaa.ī kā bhaa.ī

aadmī kī ye kaisī ravish hai dil meñ is ke ye kaisī ḳhalish hai

ġhair se qurbat-e-dostāna aur apnoñ se be-e'tinā.ī

ḳhidmat-e-ḳhalq meñ din guzāreñ zindagī is tarah se sañvāreñ

āqibat meñ mile surḳh-rūī aur yahāñ bhī na ho jag-hañsā.ī

sab se behtar hai sabr-o-qanā.at ruuh ko is se miltī hai rāhat

lā na harf-e-shikāyat zabāñ par sun na 'zauqī' kisī kī burā.ī

dur rah kar watan ki faza se jab bhi ahbab ki yaad aai

hijr mein rah gaya dil taDap kar aankh fart-e-alam se bhar aai

gulshan-e-hasrat-o-arzu ki jab kali koi khulne pe aai

baad-e-sarsar ne mare tamanche is KHata par ki kyun muskurai

ahl-e-zar se ye uns-o-mohabbat be-zaron se ye andaz-e-nafrat

khul gaya aap ka zohd-o-taqwa dekh li aap ki parsai

wo tasannoa hai aKHlaq kya hai wo numaish hai iKHlas kab hai

wo mohabbat nahin hai riya hai ho na jab tak dilon mein safai

un ka anjam hai sar-bulandi jin ke dil mein nahin KHud-pasandi

jin ko mahbub hai KHaksari un ko aati nahin KHud-satai

dil hai insan ka aabgina is ke jalwon ka hai ye KHazina

baiThne den na gard-e-kudurat aabgine ki rakkhe safai

roz-e-mahshar ki wo jaan-gudazi had na hogi sarasimgi ki

kaam aaegi us din yaqinan aasiyon ke liye mustafai

teri rahmat ka dil ko yaqin hai is mein mujh ko koi shak nahin hai

hogi maqbul ek roz yarab tere dar ki meri jubba-sai

daur-daura hai kizb-o-riya ka hai dilon se KHulus aaj anqa

dekhiye ab kahan ja rahi hai apne markaz se haT kar KHudai

kya ab insaniyat mar chuki hai bad-zani dil mein ghar kar chuki hai

kuchh samajh mein nahin aa raha hai kyun hai bad-KHwah bhai ka bhai

aadmi ki ye kaisi rawish hai dil mein is ke ye kaisi KHalish hai

ghair se qurbat-e-dostana aur apnon se be-e'tinai

KHidmat-e-KHalq mein din guzaren zindagi is tarah se sanwaren

aaqibat mein mile surKH-rui aur yahan bhi na ho jag-hansai

sab se behtar hai sabr-o-qanaat ruh ko is se milti hai rahat

la na harf-e-shikayat zaban par sun na 'zauqi' kisi ki burai