dur se mujhko na munh apna dikhao jao

duur se mujh ko na muñh apnā dikhāo jaao

bas jī bas dekh liyā maiñ tumheñ jaao jaao

is qadar aamad o shud tum ko zarar rakhtī hai

dostāñ har ghaḌī is kū maiñ na aao jaao

''jā.ūñ jā.ūñ'' hī jo karte ho to maan.e hai kaun

jaao mat jaao jo jaate ho to jaao jaao

aap kī āñkhoñ se mere ta.iiñ Dar lagtā hai

mujh sitam-kushta se āñkheñ na milāo jaao

tum jahāñ jaate ho mujh ko bhī ḳhabar hai sāhib

apne jaane ko na bande se chhupāo jaao

sair-e-gulshan ko agar jaate ho hamrāh-e-raqīb

baḳhsho mere ta.iiñ mujh ko na bulāo jaao

ham se kyā muñh ko chhupā.e hue jaate ho tum

ham ne pahchān liyā muñh na chhupāo jaao

aap kī merī kisī tarah na hove kī sulh

fā.eda kuchh nahīñ bāteñ na banāo jaao

kyā miyāñ 'mus.hafī' yaañ jī ke ta.iiñ kho.oge

us ke kūche se kahīñ raḳht uThāo jaao

dur se mujh ko na munh apna dikhao jao

bas ji bas dekh liya main tumhein jao jao

is qadar aamad o shud tum ko zarar rakhti hai

dostan har ghaDi is ku main na aao jao

jaun jaun hi jo karte ho to mane hai kaun

jao mat jao jo jate ho to jao jao

aap ki aankhon se mere tain Dar lagta hai

mujh sitam-kushta se aankhen na milao jao

tum jahan jate ho mujh ko bhi KHabar hai sahib

apne jaane ko na bande se chhupao jao

sair-e-gulshan ko agar jate ho hamrah-e-raqib

baKHsho mere tain mujh ko na bulao jao

hum se kya munh ko chhupae hue jate ho tum

hum ne pahchan liya munh na chhupao jao

aap ki meri kisi tarah na howe ki sulh

faeda kuchh nahin baaten na banao jao

kya miyan 'mushafi' yan ji ke tain khooge

us ke kuche se kahin raKHt uThao jao