dur tak bhi aahaT ki aas jab na rah jae

duur tak bhī aahaT kī aas jab na rah jaa.e

koī kis tarah dil ko shām-e-ġham meñ bahlā.e

kyā karūñ kahāñ jā.ūñ kaise jī ko bahlā.ūñ

chāñd kī bhī ThanDak jab dil pe aag barsā.e

jab bhī bazm-e-ḳhūbāñ meñ tum ko bhūlnā chāhā

dard kuchh sivā uTThā yaad tum sivā aa.e

hāl-e-dil na kuchh pūchho jaise umr bhar koī

muntazir kisī kā ho aur na vo kabhī aa.e

sochte hue jī meñ ab kabhī na ā.eñge

aaj phir tire dar se dil-shikasta uTh aa.e

tark-e-dostī par bhī aaj dekh kar un ko

dil pe ahd-e-ulfat ke naqsh sab ubhar aa.e

yaad aa rahī hogī un ko bhī mirī shāyad

raat der tak mujh ko yaad vo 'shahāb' aa.e

dur tak bhi aahaT ki aas jab na rah jae

koi kis tarah dil ko sham-e-gham mein bahlae

kya karun kahan jaun kaise ji ko bahlaun

chand ki bhi ThanDak jab dil pe aag barsae

jab bhi bazm-e-KHuban mein tum ko bhulna chaha

dard kuchh siwa uTTha yaad tum siwa aae

haal-e-dil na kuchh puchho jaise umr bhar koi

muntazir kisi ka ho aur na wo kabhi aae

sochte hue ji mein ab kabhi na aaenge

aaj phir tere dar se dil-shikasta uTh aae

tark-e-dosti par bhi aaj dekh kar un ko

dil pe ahd-e-ulfat ke naqsh sab ubhar aae

yaad aa rahi hogi un ko bhi meri shayad

raat der tak mujh ko yaad wo 'shahab' aae