dur tak chaaron taraf mere siwa koi na tha

duur tak chāroñ taraf mere sivā koī na thā

phir palak jhapkī to kyā dekhā ki ḳhud maiñ bhī na thā

ik taḌap bijlī kī aur dīvār-o-dar miTTī ke Dher

ik taḌap sho.ale kī aur dariyāoñ meñ paanī na thā

dā.ere bantī sadā.eñ chhū ke jab hadd-e-ufuq

apne markaz kī taraf lauTīñ to kuchh baaqī na thā

qaid-e-zindān-e-jasad meñ thā ye kab kashf-e-vajūd

aur bhī kuchh thā maiñ sirf ik paikar-e-ḳhākī na thā

kyā ḳhabar tum ne kahāñ kis ruup meñ dekhā mujhe

maiñ kahīñ motī kahīñ patthar kahīñ ā.īna thā

deñ hisāb-e-roz-o-shab kyā us ko jis ke dard se

koī saa.at koī lamha koī pal ḳhālī na thā

aarzū la.al-o-gohar kī kis liye kartā 'bashīr'

harf-o-ma.anī kā ḳhazīna kyā use kaafī na thā

dur tak chaaron taraf mere siwa koi na tha

phir palak jhapki to kya dekha ki KHud main bhi na tha

ek taDap bijli ki aur diwar-o-dar miTTi ke Dher

ek taDap shoale ki aur dariyaon mein pani na tha

daere banti sadaen chhu ke jab hadd-e-ufuq

apne markaz ki taraf lauTin to kuchh baqi na tha

qaid-e-zindan-e-jasad mein tha ye kab kashf-e-wajud

aur bhi kuchh tha main sirf ek paikar-e-KHaki na tha

kya KHabar tum ne kahan kis rup mein dekha mujhe

main kahin moti kahin patthar kahin aaina tha

den hisab-e-roz-o-shab kya us ko jis ke dard se

koi saat koi lamha koi pal KHali na tha

aarzu lal-o-gohar ki kis liye karta 'bashir'

harf-o-mani ka KHazina kya use kafi na tha