dur tak nahin milti rah shadmani ki

duur tak nahīñ miltī raah shādmānī kī

ishq jis ko kahte haiñ bhuul hai javānī kī

koī shai agar bhātī is jahān-e-fānī kī

ham bhī aarzū karte umr-e-jāvedānī kī

aap mere ashkoñ ko leñ na apne dāman par

aap ko nahīñ mālūm aag hai ye paanī kī

aaj apnī ḳhuddārī ban ga.ī sipar varna

choT khā ga.e hote un kī mehrbānī kī

aisā lag rahā hai ab un ke hijr meñ jaise

maut ne badal lī hai shakl zindagānī kī

ghuT ke rah ga.e dil meñ dil ke saare afsāne

kab zabāñ samajhtā hai koī be-zabānī kī

ḳhaar se shanāsā.ī chashm-poshiyāñ gul se

ye adā bhī dekhī hai ham ne bāġhbānī kī

ab jahāñ bhī le jaa.e ab jidhar bhī le jaa.e

dil ko sauñp dī ham ne rahbarī javānī kī

miT ga.ī vafā to phir dil meñ kyā rahā baaqī

ek hī nishānī thī merī be-nishānī kī

ai dil-e-sitam-ḳhurda un se rahm kī hasrat

ik dalīl-e-puḳhta hai terī nā-tavānī kī

ai 'ḳhalish' mujhe duniyā kis tarah bhulā.egī

jaan ban gayā huuñ maiñ is kī har kahānī kī

dur tak nahin milti rah shadmani ki

ishq jis ko kahte hain bhul hai jawani ki

koi shai agar bhati is jahan-e-fani ki

hum bhi aarzu karte umr-e-jawedani ki

aap mere ashkon ko len na apne daman par

aap ko nahin malum aag hai ye pani ki

aaj apni KHuddari ban gai sipar warna

choT kha gae hote un ki mehrbani ki

aisa lag raha hai ab un ke hijr mein jaise

maut ne badal li hai shakl zindagani ki

ghuT ke rah gae dil mein dil ke sare afsane

kab zaban samajhta hai koi be-zabani ki

KHar se shanasai chashm-poshiyan gul se

ye ada bhi dekhi hai hum ne baghbani ki

ab jahan bhi le jae ab jidhar bhi le jae

dil ko saunp di hum ne rahbari jawani ki

miT gai wafa to phir dil mein kya raha baqi

ek hi nishani thi meri be-nishani ki

ai dil-e-sitam-KHurda un se rahm ki hasrat

ek dalil-e-puKHta hai teri na-tawani ki

ai 'KHalish' mujhe duniya kis tarah bhulaegi

jaan ban gaya hun main is ki har kahani ki