دور تک نگاہوں میں حسن مسکراتا ہے

دور تک نگاہوں میں حسن مسکراتا ہے

وہ ادھر سے گزرے ہیں راستہ بتاتا ہے

آنسوؤں پہ رہ رہ کر قہقہے لگاتا ہے

یوں بھی تیرا دیوانہ ناز غم اٹھاتا ہے

جب تو میرا منزل تک ساتھ دے نہیں سکتا

پتھروں کو کیوں میری راہ سے ہٹاتا ہے

سوچنا ابھی کیسا عشق کے سمندر میں

کون پار ہوتا ہے کون ڈوب جاتا ہے

غم تو غم خوشی سے بھی واسطہ نہیں رہتا

اک مقام ایسا بھی زندگی میں آتا ہے

ہنس رہا ہے اک عالم تیرے غم کے ماروں پر

وقت دیکھیے اب کیا فیصلہ سناتا ہے