dur tak phail gai sab ki zaban tak pahunchi

duur tak phail ga.ī sab kī zabāñ tak pahuñchī

baat tab jā ke mire vahm-o-gumāñ tak pahuñchī

pyaas ne mujh ko to bas maar hī Daalā thā magar

kashish-e-zīst mirī āb-e-ravāñ tak pahuñchī

ḳhaak jab ḳhaak se Takrā.ī to ik shor uThā

jaan jab jaan se guzrī to amaañ tak pahuñchī

dhaḌkano meñ tirī aamad se vo jhankār huī

lab khule bhī nahīñ aur baat bayāñ tak pahuñchī

merī āñkhoñ se mire ḳhvāb churāne vaalā

pūchhtā hai ki mirī niiñd kahāñ tak pahuñchī

koī to shai thī 'alīnā' jo in āñkhoñ se chalī

dil meñ paivast huī aur rag-e-jāñ tak pahuñchī

dur tak phail gai sab ki zaban tak pahunchi

baat tab ja ke mere wahm-o-guman tak pahunchi

pyas ne mujh ko to bas mar hi Dala tha magar

kashish-e-zist meri aab-e-rawan tak pahunchi

KHak jab KHak se Takrai to ek shor uTha

jaan jab jaan se guzri to aman tak pahunchi

dhaDkano mein teri aamad se wo jhankar hui

lab khule bhi nahin aur baat bayan tak pahunchi

meri aankhon se mere KHwab churane wala

puchhta hai ki meri nind kahan tak pahunchi

koi to shai thi 'alina' jo in aankhon se chali

dil mein paiwast hui aur rag-e-jaan tak pahunchi