دور تک رینگتے قدموں کے نشاں پائے ہیں

دور تک رینگتے قدموں کے نشاں پائے ہیں

جب کبھی اپنے تعاقب میں نکل آئے ہیں

زندگی اپنی کشاکش ہی میں گھر کر ابھری

ہوں گے وہ اور جو حالات سے گھبرائے ہیں

کیا رہے یاد بھلا یورش افکار میں اب

کتنے پتھر غم ایام نے برسائے ہیں

ہم نے ہر ذرہ کو بخشی ہے تبسم کی ضیا

ہم ہی پھر ننگ وفا دہر میں کہلائے ہیں

زندگی آ کبھی مڑ کر ذرا دیکھیں تو سہی

کتنے زخموں کے قدم راہ میں چھوڑ آئے ہیں

عکس ہی عکس ہیں چہروں کے نشاں تک بھی نہیں

ہائے کس شہر میں ہم لوگ نکل آئے ہیں

کتنا پر ہول ہے یہ دشت وفا بھی اطہرؔ

بارہا اپنی ہی آواز سے تھرائے ہیں