dusron ke waste bad-haal rah kar kya mila

dūsroñ ke vāste bad-hāl rah kar kyā milā

ġham chhupā kar umr bhar ḳhush-hāl rah kar kyā milā

sirf logoñ ko hañsī aa.ī mire hālāt par

kyā batā.eñ be-sabab kañgāl rah kar kyā milā

be-sahārā un parindoñ kā Thikāna piiTh par

aap kyā samjheñge mujh ko Daal rah kar kyā milā

neh kī puchkāriyoñ ke saath maiñ ashīsh bhī

maiñ samajh saktā huuñ roTī daal rah kar kyā milā

jānvar insān pakshī koī bhī aatā nahīñ

gaañv kā sūkhā huā phir taal rah kar kyā milā

in parindoñ ko pakaḌ kar qaid karnā be-sabab

soñchtā huuñ zindagī bhar jaal rah kar kyā milā

aañkh se bahte hue aañsū nahīñ pochhe ga.e

vyarth hī rakkhā rahā rūmāl rah kar kyā milā

dusron ke waste bad-haal rah kar kya mila

gham chhupa kar umr bhar KHush-haal rah kar kya mila

sirf logon ko hansi aai mere haalat par

kya bataen be-sabab kangal rah kar kya mila

be-sahaara un parindon ka Thikana piTh par

aap kya samjhenge mujh ko Dal rah kar kya mila

neh ki puchkariyon ke sath main ashish bhi

main samajh sakta hun roTi dal rah kar kya mila

jaanwar insan pakshi koi bhi aata nahin

ganw ka sukha hua phir tal rah kar kya mila

in parindon ko pakaD kar qaid karna be-sabab

sonchta hun zindagi bhar jal rah kar kya mila

aankh se bahte hue aansu nahin pochhe gae

wyarth hi rakkha raha rumal rah kar kya mila