na ganwao nawak-e-nim-kash dil-e-reza-reza ganwa diya

na gañvāo nāvak-e-nīm-kash dil-e-reza-reza gañvā diyā

jo bache haiñ sañg sameT lo tan-e-dāġh-dāġh luTā diyā

mire chāra-gar ko naved ho saf-e-dushmanāñ ko ḳhabar karo

jo vo qarz rakhte the jaan par vo hisāb aaj chukā diyā

karo kaj jabīñ pe sar-e-kafan mire qātiloñ ko gumāñ na ho

ki ġhurūr-e-ishq kā bāñkpan pas-e-marg ham ne bhulā diyā

udhar ek harf ki kushtanī yahāñ laakh uzr thā guftanī

jo kahā to sun ke uḌā diyā jo likhā to paḌh ke miTā diyā

jo ruke to koh-e-girāñ the ham jo chale to jaañ se guzar ga.e

rah-e-yār ham ne qadam qadam tujhe yādgār banā diyā

na ganwao nawak-e-nim-kash dil-e-reza-reza ganwa diya

jo bache hain sang sameT lo tan-e-dagh-dagh luTa diya

mere chaara-gar ko nawed ho saf-e-dushmanan ko KHabar karo

jo wo qarz rakhte the jaan par wo hisab aaj chuka diya

karo kaj jabin pe sar-e-kafan mere qatilon ko guman na ho

ki ghurur-e-ishq ka bankpan pas-e-marg hum ne bhula diya

udhar ek harf ki kushtani yahan lakh uzr tha guftani

jo kaha to sun ke uDa diya jo likha to paDh ke miTa diya

jo ruke to koh-e-giran the hum jo chale to jaan se guzar gae

rah-e-yar hum ne qadam qadam tujhe yaadgar bana diya