ehsan-e-sang-o-KHisht uTha lena chahiye

ehsān-e-sañg-o-ḳhisht uThā lenā chāhiye

ghar ab koī na koī banā lenā chāhiye

itnī ġhalat nahīñ hai ye vaa.iz kī baat bhī

thoḌā bahut savāb kamā lenā chāhiye

hālāt kyā hoñ agle paḌāv pe kyā ḳhabar

sapnā yā sañg koī bachā lenā chāhiye

vo raat hai ki saaya badan se hai munharif

ham kis jagah khaḌe haiñ patā lenā chāhiye

dushman yā dost kaun khaḌā hai pas-e-ġhubār

jo so rahe haiñ un ko jagā lenā chāhiye

husn-e-butāñ kī baat hī 'azmī' chhiḌī rahe

mausam kā kuchh na kuchh to mazā lenā chāhiye

ehsan-e-sang-o-KHisht uTha lena chahiye

ghar ab koi na koi bana lena chahiye

itni ghalat nahin hai ye waiz ki baat bhi

thoDa bahut sawab kama lena chahiye

haalat kya hon agle paDaw pe kya KHabar

sapna ya sang koi bacha lena chahiye

wo raat hai ki saya badan se hai munharif

hum kis jagah khaDe hain pata lena chahiye

dushman ya dost kaun khaDa hai pas-e-ghubar

jo so rahe hain un ko jaga lena chahiye

husn-e-butan ki baat hi 'azmi' chhiDi rahe

mausam ka kuchh na kuchh to maza lena chahiye