احسان ہے گو تیرا ستم اٹھ نہیں سکتا

احسان ہے گو تیرا ستم اٹھ نہیں سکتا

خوددار سے یہ بار کرم اٹھ نہیں سکتا

خود بت کے پجاری نہ سمجھ پائے حقیقت

تم سے یہ حجاب اہل حرم اٹھ نہیں سکتا

اب بت ہیں حرم میں نہ تجلیٔ بتاں ہے

کعبے کی طرف میرا قدم اٹھ نہیں سکتا

جس درد پہ نازاں ہیں شہیدان محبت

وہ دل میں کبھی تیرے صنم اٹھ نہیں سکتا

ہوں راحت و آرام سے امداد کا طالب

اب دل سے مرے بار الم اٹھ نہیں سکتا

اعزاز یہ حاصل ہے فقط اہل قلم کو

ہر ایک سے ہاتھوں میں قلم اٹھ نہیں سکتا