ehsas-e-nadamat hai na kuchh pas-e-wafa hai

ehsās-e-nadāmat hai na kuchh pās-e-vafā hai

ik karb ke 'ālam meñ yahāñ ḳhalq-e-ḳhudā hai

ik shaḳhs jo manzil hai mirī merā patā hai

rakh kar vo kahīñ aur mujhe bhuul gayā hai

ik maiñ ki kisī dasht kā āvāra musāfir

ik vo ki har ik rah kā vahī qibla-numā hai

us shahr-e-sitamgar kā sitam pūchh na ham se

us shoḳh sitamgar kā sitam had se sivā hai

pāband-e-salāsil haiñ ham ik 'arse se 'āmir'

zindāñ meñ kahīñ shor na kuchh āh-o-bukā hai

ehsas-e-nadamat hai na kuchh pas-e-wafa hai

ek karb ke 'alam mein yahan KHalq-e-KHuda hai

ek shaKHs jo manzil hai meri mera pata hai

rakh kar wo kahin aur mujhe bhul gaya hai

ek main ki kisi dasht ka aawara musafir

ek wo ki har ek rah ka wahi qibla-numa hai

us shahr-e-sitamgar ka sitam puchh na hum se

us shoKH sitamgar ka sitam had se siwa hai

paband-e-salasil hain hum ek 'arse se 'amir'

zindan mein kahin shor na kuchh aah-o-buka hai