ehsas ka qissa hai sunana to paDega

ehsās kā qissa hai sunānā to paḌegā

har zaḳhm ko ab phuul banānā to paḌegā

mumkin hai mire sher meñ har raaz ho lekin

ik raaz pas-e-sher chhupānā to paḌegā

āñkhoñ ke jazīroñ pe haiñ nīlam kī qatāreñ

ḳhvāboñ kā janāza hai uThānā to paḌegā

chehre pe ka.ī chehre liye phirtī hai duniyā

ab aa.ina duniyā ko dikhānā to paḌegā

zehnoñ pe musallat haiñ siyah soch ke bādal

zulmat meñ diyā dil kā jalānā to paḌegā

vo dushman-e-jāñ jaan se pyārā bhī hameñ hai

rūThe vo agar us ko manānā to paḌegā

rishtoñ kā yahī vasf hai 'zākir' kī nazar meñ

kamzor sahī rishta nibhānā to paḌegā

ehsas ka qissa hai sunana to paDega

har zaKHm ko ab phul banana to paDega

mumkin hai mere sher mein har raaz ho lekin

ek raaz pas-e-sher chhupana to paDega

aankhon ke jaziron pe hain nilam ki qataren

KHwabon ka janaza hai uThana to paDega

chehre pe kai chehre liye phirti hai duniya

ab aaina duniya ko dikhana to paDega

zehnon pe musallat hain siyah soch ke baadal

zulmat mein diya dil ka jalana to paDega

wo dushman-e-jaan jaan se pyara bhi hamein hai

ruThe wo agar us ko manana to paDega

rishton ka yahi wasf hai 'zakir' ki nazar mein

kamzor sahi rishta nibhana to paDega