ehsas ke makan ka darwaza kholiye

ehsās ke makān kā darvāza kholiye

sach ko dabī zabāñ se sahī sach to boliye

TuuTe na be-irāda kahīñ dil raqīb kā

mīzān-e-zehn meñ zarā alfāz toliye

dukh meñ to ḳhaak hī ne subūt-e-vafā diyā

hamrāh mere dhuul ke zarrāt ho liye

niglā na jā sake jise uglā na jā sake

yuuñ zahr zindagī meñ kisī kī na gholiye

sūraj se raushnī kī lakīreñ sameT kar

har sub.h ham ne daaġh añdheroñ ke dho liye

letā huuñ chand āḳhirī sāñseñ TaTol kar

ab aap aa.iye zarā do lafz boliye

dil kā charāġh kaun hai ik nafs ke sivā

āñkhoñ meñ 'nūr' ashk-e-nadāmat TaToliye

ehsas ke makan ka darwaza kholiye

sach ko dabi zaban se sahi sach to boliye

TuTe na be-irada kahin dil raqib ka

mizan-e-zehn mein zara alfaz toliye

dukh mein to KHak hi ne subut-e-wafa diya

hamrah mere dhul ke zarraat ho liye

nigla na ja sake jise ugla na ja sake

yun zahr zindagi mein kisi ki na gholiye

suraj se raushni ki lakiren sameT kar

har subh hum ne dagh andheron ke dho liye

leta hun chand aaKHiri sansen TaTol kar

ab aap aaiye zara do lafz boliye

dil ka charagh kaun hai ek nafs ke siwa

aankhon mein 'nur' ashk-e-nadamat TaToliye