ehsas ki diwar gira di hai chala ja

ehsās kī dīvār girā dī hai chalā jā

jaane ke liye yaar jagah dī hai chalā jā

ai qais-numā shaḳhs yahāñ kuchh nahīñ terā

tujh naam kī sahrā meñ munādī hai chalā jā

duniyā to chalo ġhair thī shikva nahīñ us se

tū ne bhī to auqāt dikhā dī hai chalā jā

tā koī bahāna tire pairoñ se na lipTe

dīvār se tasvīr haTā dī hai chalā jā

yak-tarfa mohabbat kā ḳhasārā hai muqaddar

tujh ḳhvāb kī ta.abīr batā dī hai chalā jā

ham aise faqīroñ meñ nahīñ māda-parastī

terā to miyāñ sher bhī maadī hai chalā jā

hai kaun rukāvaT jo tujhe rok rahī hai

maiñ ne to mirī zaat bhī Dhā dī hai chalā jā

is shahr ke logoñ meñ nahīñ quvvat-e-bardāsht

ye shahr to saarā hī fasādī hai chalā jā

dastak ke liye uTThā huā haath na girtā

ḳhāmoshī ne ta.azīr sunā dī hai chalā jā

kuchh 'jaun' qabīle se nahīñ terā ta.alluq

har laḌkī yahāñ fāriha-zādī hai chalā jā

jaanā tirī fitrat hai bulānā mirī qismat

to aa ke chale jaane kā aadī hai chalā jā

lagtā hai tū kābul meñ nayā aayā hai pyāre

afġhān kā bachcha bhī jihādī hai chalā jā

ai mom-badan terā guzārā nahīñ mumkin

ye aag meñ jaltī huī vaadī hai chalā jā

afsos bahut der se aayā hai tū 'kāshir'

is pāñch may ko mirī shādī hai chalā jā

ehsas ki diwar gira di hai chala ja

jaane ke liye yar jagah di hai chala ja

ai qais-numa shaKHs yahan kuchh nahin tera

tujh nam ki sahra mein munadi hai chala ja

duniya to chalo ghair thi shikwa nahin us se

tu ne bhi to auqat dikha di hai chala ja

ta koi bahana tere pairon se na lipTe

diwar se taswir haTa di hai chala ja

yak-tarfa mohabbat ka KHasara hai muqaddar

tujh KHwab ki tabir bata di hai chala ja

hum aise faqiron mein nahin mada-parasti

tera to miyan sher bhi madi hai chala ja

hai kaun rukawaT jo tujhe rok rahi hai

main ne to meri zat bhi Dha di hai chala ja

is shahr ke logon mein nahin quwwat-e-bardasht

ye shahr to sara hi fasadi hai chala ja

dastak ke liye uTTha hua hath na girta

KHamoshi ne tazir suna di hai chala ja

kuchh 'jaun' qabile se nahin tera talluq

har laDki yahan fariha-zadi hai chala ja

jaana teri fitrat hai bulana meri qismat

to aa ke chale jaane ka aadi hai chala ja

lagta hai tu kabul mein naya aaya hai pyare

afghan ka bachcha bhi jihadi hai chala ja

ai mom-badan tera guzara nahin mumkin

ye aag mein jalti hui wadi hai chala ja

afsos bahut der se aaya hai tu 'kashir'

is panch may ko meri shadi hai chala ja