ehsas pe chhaya hai ek ehsas-e-garan aur

ehsās pe chhāyā hai ik ehsās-e-garāñ aur

ab dil bhī dhaḌaktā hai to hotā hai gumāñ aur

allāh re āshuftagī-e-shauq kā aalam

karte haiñ vo pursish to guzartā hai gumāñ aur

thamtī hī nahīñ joshish-e-jazbāt-e-mohabbat

kahte haiñ kuchh un se to bahaktī hai zabāñ aur

ik rabt bahar-hāl hai us rāhat-e-jāñ se

baḌhtā hai to baḌhne do abhī dard-e-nihāñ aur

shāyad ki abhī ḳhatm nahīñ silsila-e-shauq

nazroñ meñ hai ik manzil-e-benām-o-nishāñ aur

vāqif haiñ vo ḳhud apne har andāz-e-sitam se

ham kaise kaheñ dil meñ haiñ zaḳhmoñ ke nishāñ aur

kyā qahr hai majbūrī-e-ādāb-e-mohabbat

lete haiñ tirā naam to ruktī hai zabāñ aur

'ahmar' tapish-e-shauq salāmat hai ki pahroñ

rah rah ke abhī dil se jo uThtā hai dhuāñ aur

ehsas pe chhaya hai ek ehsas-e-garan aur

ab dil bhi dhaDakta hai to hota hai guman aur

allah re aashuftagi-e-shauq ka aalam

karte hain wo pursish to guzarta hai guman aur

thamti hi nahin joshish-e-jazbaat-e-mohabbat

kahte hain kuchh un se to bahakti hai zaban aur

ek rabt bahar-haal hai us rahat-e-jaan se

baDhta hai to baDhne do abhi dard-e-nihan aur

shayad ki abhi KHatm nahin silsila-e-shauq

nazron mein hai ek manzil-e-benam-o-nishan aur

waqif hain wo KHud apne har andaz-e-sitam se

hum kaise kahen dil mein hain zaKHmon ke nishan aur

kya qahr hai majburi-e-adab-e-mohabbat

lete hain tera nam to rukti hai zaban aur

'ahmar' tapish-e-shauq salamat hai ki pahron

rah rah ke abhi dil se jo uThta hai dhuan aur