ehsasat ki basti mein jab har jaanib ek sannaTa tha

ehsāsāt kī bastī meñ jab har jānib ik sannāTā thā

maiñ āvāzoñ ke jañgal meñ tab jaane kyā DhūñD rahā thā

jin rāhoñ se apne dil kā har qissa mansūb rahā hai

ab to ye bhī yaad nahīñ hai un rāhoñ kā qissa kyā thā

aaj usī ke afsānoñ kā mahfil mahfil charchā hogā

kal chaurāhe par tanhā jo shaḳhs bahut ḳhāmosh khaḌā thā

yuuñ jīvan ras kab detā hai phir se apne zaḳhm kuredo

tum ne āḳhir kyā sochā thā dard se kyuuñ sannyās liyā thā

aisī koī baat nahīñ thī un rāhoñ se lauT bhī aate

lekin un rāhoñ pe kisī ne kuchh din apnā saath diyā thā

is nagrī meñ lag-bhag sab ne ek tarah se choTeñ khā.īñ

lekin zaḳhmoñ ko sahlāne kā sab kā andāza judā thā

tum un begānī rāhoñ meñ āḳhir kis ko DhūñD rahe ho

vo to kab kā lauT chukā hai kal jo tumhāre saath chalā thā

ehsasat ki basti mein jab har jaanib ek sannaTa tha

main aawazon ke jangal mein tab jaane kya DhunD raha tha

jin rahon se apne dil ka har qissa mansub raha hai

ab to ye bhi yaad nahin hai un rahon ka qissa kya tha

aaj usi ke afsanon ka mahfil mahfil charcha hoga

kal chaurahe par tanha jo shaKHs bahut KHamosh khaDa tha

yun jiwan ras kab deta hai phir se apne zaKHm kuredo

tum ne aaKHir kya socha tha dard se kyun sannyas liya tha

aisi koi baat nahin thi un rahon se lauT bhi aate

lekin un rahon pe kisi ne kuchh din apna sath diya tha

is nagri mein lag-bhag sab ne ek tarah se choTen khain

lekin zaKHmon ko sahlane ka sab ka andaza juda tha

tum un begani rahon mein aaKHir kis ko DhunD rahe ho

wo to kab ka lauT chuka hai kal jo tumhaare sath chala tha