ehtimam-e-rasan-o-dar se kya hota hai

ehtimām-e-rasan-o-dār se kyā hotā hai

jis qadar zulm baḌhe azm sivā hotā hai

saut o āhang hī pairāya-e-iz.hār nahīñ

be-navā.ī meñ bhī andāz-e-navā hotā hai

ġham-zado dā.era-e-ġham se nikal kar dekho

dard se dard kā ehsās baḌā hotā hai

itne badle ga.e ādāb ki ab mahfil meñ

dil kī dhaḌkan pe bhī ehsās-e-sazā hotā hai

ravish-e-vaqt se māyūs na hoñ ahl-e-nazar

sāneha qismat-e-arbāb-e-vafā hotā hai

ehtimam-e-rasan-o-dar se kya hota hai

jis qadar zulm baDhe azm siwa hota hai

saut o aahang hi pairaya-e-izhaar nahin

be-nawai mein bhi andaz-e-nawa hota hai

gham-zado daera-e-gham se nikal kar dekho

dard se dard ka ehsas baDa hota hai

itne badle gae aadab ki ab mahfil mein

dil ki dhaDkan pe bhi ehsas-e-saza hota hai

rawish-e-waqt se mayus na hon ahl-e-nazar

saneha qismat-e-arbab-e-wafa hota hai