ehtiram-e-gardish-e-ayyam karna hi paDa

ehtirām-e-gardish-e-ayyām karnā hī paḌā

ġham ġhalat karne ko shaġhl-e-jām karnā hī paḌā

muztarib rakhtā thā pal pal karb-e-ehsās-e-ziyāñ

āḳhir is muuzī ko zer-e-dām karnā hī paḌā

saath detī kab talak purkhoñ kī chhoḌī jā.idād

ek ik karke sabhī nīlām karnā hī paḌā

pai-ba-pai nākāmiyoñ kā karb thā sohān-e-rūh

qalb ko begāna-e-ālām karnā hī paḌā

mehrbāñ kahnā paḌā 'aḳhtar' kisī be-mehr ko

jo nahīñ karnā thā vo bhī kaam karnā hī paḌā

ehtiram-e-gardish-e-ayyam karna hi paDa

gham ghalat karne ko shaghl-e-jam karna hi paDa

muztarib rakhta tha pal pal karb-e-ehsas-e-ziyan

aaKHir is muzi ko zer-e-dam karna hi paDa

sath deti kab talak purkhon ki chhoDi jaidad

ek ek karke sabhi nilam karna hi paDa

pai-ba-pai nakaamiyon ka karb tha sohan-e-ruh

qalb ko begana-e-alam karna hi paDa

mehrban kahna paDa 'aKHtar' kisi be-mehr ko

jo nahin karna tha wo bhi kaam karna hi paDa