ehtiyat ai dil-e-nadan wo zamane na rahe

ehtiyāt ai dil-e-nādāñ vo zamāne na rahe

tere ushshāq tire chāhne vaale na rahe

jin se qaa.em thī tirī shoḳh-nigāhī kī adā

rañg-e-mahfil vo junūñ-ḳhez ishāre na rahe

ai gul-e-shoḳh-adā tujh ko ḳhabar hai ki nahīñ

jo muhāfiz the tire ab vahī kāñTe na rahe

ham jinheñ ham-safar-e-rāh-e-vafā jānte the

kyā batā.eñ ki vahī log hamāre na rahe

sub.h se shaam talak bārish-e-anvār rahī

raat aa.ī to in āñkhoñ meñ sitāre na rahe

ehtiyat ai dil-e-nadan wo zamane na rahe

tere ushshaq tere chahne wale na rahe

jin se qaem thi teri shoKH-nigahi ki ada

rang-e-mahfil wo junun-KHez ishaare na rahe

ai gul-e-shoKH-ada tujh ko KHabar hai ki nahin

jo muhafiz the tere ab wahi kanTe na rahe

hum jinhen ham-safar-e-rah-e-wafa jaante the

kya bataen ki wahi log hamare na rahe

subh se sham talak barish-e-anwar rahi

raat aai to in aankhon mein sitare na rahe