ایک آئینہ میان من و تو رکھ دینا

ایک آئینہ میان من و تو رکھ دینا

کبھی تصویر ترشنا تو کبھو رکھ دینا

کوزہ گر اب کے بنانا مجھے وحشت تمثال

درد میں کیف تبسم میں لہو رکھ دینا

میں کسی اور ستارے پہ کھلوں گی اس بار

تو مری خاک تہ خاک نمو رکھ دینا

وا کیے آنا ترا وہ در مے خانۂ چشم

اور وہ دل کا پرے جام و سبو رکھ دینا

دیکھنا رائیگاں جائے نہ مرا قصۂ ہجر

زخمہ ور ساز میں اک تار گلو رکھ دینا

ادھ سلا ہے ابھی زخم لب سوزاں سو ادھر

اک گلاب اور بہ انداز رفو رکھ دینا

خود سے ملنا ہو تو صدیوں کے فسوں سے آگے

دشت امکان میں آوازۂ ہو رکھ دینا