ایک عالم اس کو روتا ہی رہا

ایک عالم اس کو روتا ہی رہا

اکبرؔ اپنی نیند سوتا ہی رہا

میں نہ سمجھا سرد و گرم روزگار

عمر بھر ان کو سموتا ہی رہا

میرے ارمانوں کی کثرت دیکھنا

آسماں کو عذر ہوتا ہی رہا

نفع اور نقصان ہستی کیا بتاؤں

اس قدر پایا کہ کھوتا ہی رہا

میرے دل میں ان کے مژگاں کا خیال

ایک برچھی سی چبھوتا ہی رہا

حرص جنت دن بہ دن بڑھتی گئی

مفت زاہد عمر کھوتا ہی رہا

ہم امید وصل پر جیتے رہے

عہد پورا ان کا ہوتا ہی رہا

کوچہ سفاک کب خالی رہا

اک نہ اک کا خون ہوتا ہی رہا

جو ہنر اکبرؔ نے یاں پیدا کیا

آسمان اس کو ڈبوتا ہی رہا