ek aansu jo meri aankh se Tapka hai abhi

ek aañsū jo mirī aañkh se Tapkā hai abhī

zabt kī intihā dil ya.anī ki samjhā hai abhī

ek halkī sī mahak aa.ī hai mujh tak dekho

kaun chhū kar mirī dahlīz ko guzrā hai abhī

maut kī pā.egā ik roz sazā kah do use

haq jo jiine kā yahāñ māñgne aayā hai abhī

jo mire dil meñ dhaḌaktā rahā dhaḌkan ban kar

sīḌhiyāñ dil kī mire dekh lo utrā hai abhī

chhīn kar haq mirā mālūm nahīñ hai us ko

din vo mahshar kā jo aanā thā vo aayā hai abhī

aise sākit huā ye jism ki jaise us ne

mujh pe jaadū koī paḌhte hue phūñkā hai abhī

apne bachchoñ ko tū jā aur bachā le 'fahmī'

ek gaDDhā na.ī tahzīb ne khodā hai abhī

ek aansu jo meri aankh se Tapka hai abhi

zabt ki intiha dil yani ki samjha hai abhi

ek halki si mahak aai hai mujh tak dekho

kaun chhu kar meri dahliz ko guzra hai abhi

maut ki paega ek roz saza kah do use

haq jo jine ka yahan mangne aaya hai abhi

jo mere dil mein dhaDakta raha dhaDkan ban kar

siDhiyan dil ki mere dekh lo utra hai abhi

chhin kar haq mera malum nahin hai us ko

din wo mahshar ka jo aana tha wo aaya hai abhi

aise sakit hua ye jism ki jaise us ne

mujh pe jadu koi paDhte hue phunka hai abhi

apne bachchon ko tu ja aur bacha le 'fahmi'

ek gaDDha nai tahzib ne khoda hai abhi